ექსპერტების დაკითხვის შემდეგ, პროკურატურა ვიდეომტკიცებულებების გამოკვლევას იწყებს. დარბაზს ტექნიკურად ამზადებენ. ამ შემთხვევაში ვიდეოებს პროექტორის ეკრანის ნაცვლად, იქვე მარცხნივ მდგომ ტელევიზორში გაუშვებენ. ეს ნიშნავს, რომ კადრები გარჩევადი იქნება.
სხდომის ეს ეტაპი სიტყვებით ყველაზე რთული აღსაწერია, რადგან ის, რაზეც მხარეები საუბრობენ, სრულად ვიზუალურ მასალას ანუ ვიდეოებს ეყრდნობა.
იკვლევენ ვიდეოს, სადაც პროკურატურის თქმით, ვალერი თეთრაშვილია ასახული. ტელეკომპანია „იმედის“ კადრია, კონკრეტულად „იმედი LIVE-ის“ ეთერი. კაცს მწვანე საწვიმრით ხელში უკავია, სავარაუდოდ, ორი უკვე გამოყენებული ფოიერვერკი და ისვრის იმ მიმართულებით, სადაც სპეცრაზმია განლაგებული, სპეციალურად აღჭურვილი, დამცავი ფარებით.
ვიდეოში არ ჩანს, სად ეცემა სავარაუდოდ, მუყაოს გამოყენებული ფოიერვერკი. რუსთაველის გამზირი სველია, წყლის ჭავლის გამოყენების გამო.
ვიდეოს ორჯერ უყურებენ, დარბაზში სიცილია.
მეორე ვიდეო პოსტვ-ის პირდაპირი ეთერიდანაა. დრო: 01:19, ღამე.
ადვოკატ გოგიტა ბახტაძის თქმით, პროკურატურა უთითებს, რომ 00:40 წამდე ასახული პირი გიორგი ტერიშვილია, თავად არ ადასტურებენ.
„ის ერთი ხელით იღებს ნივთს და ისვრის.... პროკურატურა კი ამტკიცებს, რომ მყარი-მძიმე საგანია", - ამბობს ადვოკატი.
შემდეგ ვიდეოზე პროკურატურის თქმით, რუსლან სივაკოვია ასახული.
„ის შემოდის კადრში და ხელში უჭირავს, რაღაც ნივთი, ამბობს პროკურორი“. რა ნივთი? - ამაზე კვლევა ჩატარებული არაა. ბრალდება ამტკიცებს, რომ ეს „მძიმე საგანია“.
შემდეგ გადის კადრიდან და რამდენიმე წუთში ისევ ჩნდება - სივაკოვი უკანა სვლით შედის კამერის კადრში და ხელებს იწმენს...
„გაისროლა“, - ამბობენ პროკურორები.
ადვოკატია ნათია კორკოტაძე ვიდეოების ყურადღებით გამოკვლევას ითხოვს, მიაჩნია, რომ ორჯერ ნახვა, როცა ვიდეო უმთავრესი მტკიცებულებაა საკმარისი არ არის.
„დავასტოპოთ და თქვას პროკურორმა, რა უჭირავს ხელში“, - ამბობს ნათია კორკოტაძე. მოსამართლე აჩუმებს. პროკურორი, ვაჟა თოდუა ისევ რთავს ვიდეოს.
ფორუმი