1921 წლის თებერვალში, 95 წლის წინ, საქართველოს დემოკრატიული რესპუბლიკა ბოლო დღეებს ითვლიდა. თავგანწირული ბრძოლების, ქართველი იუნკრებისა და ჯარისკაცების თავდადების მიუხედავად, თბილისის დამცველებმა ვერ შეძლეს ბოლშევიკური რუსეთის წითელი არმიის მიერ საქართველოს დედაქალაქზე სამი მიმართულებით განვითარებული იერიშების შეჩერება. შეიძლება ბევრი რამ ითქვას მენშევიკების მთავრობის მიერ ქვეყნის შიდა პოლიტიკასა და არმიის მშენებლობაში დაშვებულ შეცდომებზე, თუმცა ისტორიკოსი, პროფესორი გოჩა საითიძე 95 წლის წინანდელი ისტორიული მარცხის ერთ-ერთ მთავარ მიზეზად ევროპის მიერ საბჭოთა რუსეთის გავლენის სფეროდ სამხრეთ კავკასიის ცნობას ასახელებს.
