„რას ვედავებით?!", - სვამს კითხვას ლუკა ჯაბუას ადვოკატი, რუსუდან აგურაშვილი და თავადვე პასუხობ:
„ამაზე პასუხი მარტივია. ის ისჯება საკუთარი სამოქალაქო უფლების განხორციელებისათვის. აზრის გამოხატვისა და უბრალოდ საპროტესტო აქციაზე ყოფნისათვის. თქვენ მშვენივრად იცით, რომ ეს არ არის ჩვეულებრივი, რიგითი სისხლის სამართლის საქმე.
ლუკა ჯაბუასა და პროცესზე წარმოდგენილი სხვა ბრალდებულების დაკავებაც არ ყოფილა სახელმწიფოს მხრიდან დანაშაულთან ბრძოლისათვის განხორციელებული ქმედება და არ ემსახურებოდა სისხლის სამართლის კოდექსის მიზნების აღსრულებას.
მათი დაკავება, ემსახურებოდა ერთადერთ მიზანს, სახელმწიფოს დაენახებინა პროტესტის გამომხატველი საზოგადოების დანარჩენი წევრებისათვის, თუ რა დაემართებოდათ სხვებსაც, საპროტესტო აქციების გაგრძელების შემთხვევაში. ეს იყო სახელმწიფოს მხრიდან განხორციელებული “სამაგალითო დასჯა” სხვა მოქალაქეებისათვის, მცდელობა, ხალხში გაეჩინათ რეპრესიების შიში და ჩაეკლათ პროტესტი. ეს დაადასტურა არაერთმა გარემოებამ ამ თვეების განმავლობაში.
არაერთმა პოლიტიკურმა განცხადებამ, რომელიც, ხშირ შემთხვევაში, აშკარად არღვევდა უდანაშაულობის პრეზუმფციას ბრალდებულების მიმართ. სწორედ ამიტომ, ბუნებრივია, რომ იქ სადაც ადამიანს დანაშაული არ ჩაუდენია, მტკიცებულებებიც არ არსებობს".
ადვოკატმა სამივე მოწმე პოლიციელის ჩვენება დეტალურად განიხილა.
1. გიორგი გობრონიძე პიროტექნიკით დაზიანდა, რაც თავისთავად გამორიცხავს ლუკა ჯაბუას მიერ დანაშაულებრივ ქმედებას მის მიმართ.
2. გიორგი ჯანიკაშვილმა დაზიანება მიიღო 9 აპრილის ქუჩაზე. ლუკა ჯაბუას ბრალდების მხარე ედავება ჭიჭინაძის ქუჩაზე განხორციელებულ მოვლენებს, შესაბამისად გიორგი ჯანიკაშვილიც არავითარ შემხებლობაში არ არის ლუკა ჯაბუასთან.
3. გრიგოლ ჭანტურიძემ განმარტა, რომ აქციაზე მივიდა 28 ნოემბერს და დაზიანება უშუალოდ მიიღი 29 ნოემბრის 01:00-01:30 საათის დროის შუალედში. მაგრამ აქ მთავაარი ის არის, რომ ლუკა ჯაბუასთან მიმართებაში, ბრალდების მხარეს არ აქვს დაკონკრეტებული თუ 29 ნოემბრის დროის რა მონაკვეთს ედავებიან.
„ბრალში მითითებული ქმედება რომელ საათზე განხორციელდა,ამაზე სიტყვა არ არის დაკონკრეტებული საქმის არცერთ მტკიცებულებაში და შესაბამისად,შეუძლებელია გრიგოლ ჭანტურიძის ჩვენება შემხებლობაში იყოს ლუკა ჯაბუასთან", - აცხადებს ადვოკატი.
„დაზარალებულები - ეს ამ საქმის ის ნაწილია, რომელიც ყველაზე მეტად გამოხატავს კოლექტიურ ბრალს", - ამბობს ლუკა ჯაბუას ადვოკატი. ის მხოლოდ აფასებს იმ დაზარალებული პოლიციელების ჩვენებებს, რომლებიც ამბობენ, რომ დაზიანდნენ იმავე დღეს, რომელსაც ლუკა ჯაბუას ედავებიან. ეს თარიღი - 2024 წლის 29 ნოემბერია.
ასეთი მოწმე სულ სამია: გიორგი ჯანიკაშვილი, გრიგოლ ჭანტურიძე, გიორგი გობრონიძე.
ვიდეომტკიცებულება - ადვოკატის თქმით, „პროცესზე გამოკვლეულმა ვიდეო ჩანაწერებმა ნათლად დაადასტურა, რომ არცერთ ვიდეოში პოლიციის მიმართულებით რაიმეს სროლა არ ჩანს. ლუკა ჯაბუას მიმართ წარდგენილ ორივე ვიდეოში აშკარაა, რომ ოპერატორი, რომელიც ვიდეოს იღებს არის პოლიციელი და შესაბამიდად დგას პოლიციის მხარეს. ლუკა ჯაბუას ხელიდან გამოსული საგანი არ მოემართება კადრისგენ პირდაპირ, ანუ არ მოემართება კადრში მყოფი პოლიციელებისაკენ და მიდის სხვა მიმართულებით".
ფორუმი