სტრატეგიასთან დაკავშირებით უთანხმოების ნიშნები გაჩნდა, როცა პრემიერმინისტრი ბენიამინ ნეთანიაჰუ ომის ახალი ფაზის გამოცხადებისთვის მოემზადა მას შემდეგ, რაც მან თქვა, რომ ისრაელმა ჯერ კიდევ ღაზაში მყოფი მძევლების გათავისუფლების უზრუნველსაყოფად ჰამასის (აშშ-ში და ევროკავშირში ტერორისტული ორგანიზაცია) განადგურება უნდა „დაასრულოს“.
ისრაელის პრესა, ანონიმ ოფიციალურ პირებზე დაყრდნობით, ვარაუდობს ოპერაციების გამწვავებას, მათ შორის, მჭიდროდ დასახლებულ რაიონებში, როგორიცაა ქალაქი ღაზა და ლტოლვილთა ბანაკები, სადაც, სავარაუდოდ, მძევლები ჰყავთ დაკავებული.
“ფრანსპრესის” თანახმად, გავრცელდა ინფორმაცია, რომ ნეთანიაჰუ და მისი კაბინეტი ბრძანებას გასცემენ ღაზის სექტორის სრული სამხედრო ოკუპაციის შესახებ, რამაც არმიის შტაბის უფროსთან, ეიალ ზამირთან უთანხმოება გამოიწვია.
5 აგვისტოს ნეთანიაჰუმ უსაფრთხოების სამსახურების უფროსებთან სამსაათიანი დახურული შეხვედრა გამართა, რათა ომის გაგრძელების ვარიანტები განეხილათ, ნათქვამია მისი ოფისის განცხადებაში.
საზოგადოებრივი მაუწყებლის, KAN-ის ცნობით, შეხვედრაზე ზამირმა გაფრთხილება გამოთქვა, რომ სრული ოკუპაცია „ხაფანგში გაბმის“ ტოლფასი იქნებოდა.
ტელეარხ Channel 12-ის ცნობით, არმიის მეთაურმა სრული ოკუპაციის ალტერნატივები წარმოადგინა, როგორიცაა იმ კონკრეტული ტერიტორიების ალყაში მოქცევა, სადაც, სავარაუდოდ, ჰამასი იმყოფება. მაგრამ თავდაცვის მინისტრმა, ისრაელ კაცმა, მკაფიო გზავნილით უპასუხა.
"უფროსის უფლება და მოვალეობაა, გამოხატოს თავისი პოზიცია შესაბამის ფორუმებზე“, - დაწერა მან X-ზე. - „მაგრამ როგორც კი გადაწყვეტილებების მიღება ხდება პოლიტიკური ეშელონის მიერ, "ცაჰალი" (ისრაელის არმია) მათ მონდომებითა და პროფესიონალიზმით აღასრულებს... სანამ ომის მიზნები არ იქნება მიღწეული“.
ადგილობრივი მედიის ცნობით, ნეთანიაჰუ ხუთშაბათს უსაფრთხოების კაბინეტის სხდომას მოიწვევს, რათა საბოლოოდ მიიღონ გადაწყვეტილება ღაზაში სამხედრო ოპერაციის გაფართოების შესახებ.
აშშ-ის პრეზიდენტმა დონალდ ტრამპმა 5 აგვისტოს ჟურნალისტებს განუცხადა, რომ მას არ ჰქონდა ინფორმაცია მთელი ღაზის სექტორის ოკუპაციის შესახებ, თუმცა თქვა, რომ ასეთი გადაწყვეტილება „ისრაელზეა დამოკიდებული“.
2023 წლის 7 ოქტომბერს პალესტინელთა ისლამისტური მოძრაობის მიერ ისრაელზე თავდასხმის შემდეგ ისრაელის მთავრობა, რომელმაც საპასუხოდ ომი წამოიწყო ჰამასთან, მზარდ ზეწოლას განიცდის - მისგან კონფლიქტის დასრულებას მოითხოვენ.
გაეროს უშიშროების საბჭომ 5 აგვისტოს საგანგებო სხდომა გამართა ღაზაში ისრაელელი მძევლების საკითხის განსახილველად. ისრაელი ცდილობს, მძევლების საკითხი გლობალური დღის წესრიგის პრიორიტეტად შეინარჩუნოს.
პარალელურად, საერთაშორისო კრიტიკა გამძაფრდა ორ მილიონზე მეტი პალესტინელის ტანჯვის გამო, რომელთაც, გაეროს გაფრთხილებით, ფართომასშტაბიანი შიმშილობა ემუქრებათ.
ოფიციალურ მონაცემებზე დაყრდნობით, AFP-ის მიერ გამოქვეყნებული სტატისტიკით, 2023 წლის 7 ოქტომბერს განხორციელებულ თავდასხმას ისრაელის მხრიდან 1219 ადამიანი ემსხვერპლა, რომელთა უმეტესობა მშვიდობიანი მოქალაქე იყო.
პალესტინელთა ტერიტორიის ჯანდაცვის სამინისტროს (რომელსაც ჰამასი მართავს) მონაცემებით, რომლებსაც გაერო სანდოდ მიიჩნევს, ისრაელის მიერ საპასუხოდ დაწყებული საომარი მოქმედების შედეგად ღაზაში, სულ მცირე, 61 020 ადამიანი დაიღუპა, ძირითადად მშვიდობიანი მაცხოვრებლები.
ფორუმი