სანამ რუსთაველზე მიმდინარე საპროტესტო აქციის დაშლა დაიწყება ხოლმე, სპეცრაზმი თავისუფლების მოედანზე დგას და ბრძანებას ელის. მათ უკან დგას წყლის ჭავლის მანქანებიც. რაღაც მომენტში რაციაში გაისმის: ჩაფხუტები, მზადყოფნა და სპეცრაზმიც მსვლელობას იწყებს.
2 დეკემბერს, აქციის მეხუთე დღეს, სანამ სპეცრაზმი კიდევ ერთხელ მიიღებდა აქციის დაშლის ბრძანებას, რამდენიმე საათის განმავლობაში მათ მოუწიათ გვერდით შეკრებილი ოცდაათიოდე ადამიანის მოსმენა და დიალოგის გაბმაც კი. ჩვენი კამერა იქ სწორედ ამ დროს აღმოჩნდა.
კანადის საგარეო საქმეთა მინისტრი მელანი ჯოლი აცხადებს, რომ კანადა სანქციებს დაუწესებს ადამიანებსა და კომპანიებს, რომლებიც საქართველოში ადამიანის უფლებებს არღვევენ.
2 დეკემბერს რიგაში, ბალტიის ქვეყნებისა და კანადის საგარეო საქმეთა მინისტრების საერთო პრესკონფერენციაზე კანადის საგარეო საქმეთა მინისტრმა მელანი ჯოლიმ განაცხადა:
„კანადა სოლიდარობას უცხადებს ქართველ ხალხს და ძალიან გვაშფოთებს ის, რის გაკეთებას რუსეთი ცდილობს. ჩვენ მივყვებით [ამ სამი ქვეყნის] მაგალითს და, ჩვენი სანქციების რეჟიმზე დაყრდნობით, სანქციებს დავუწესებთ საკვანძო ფიგურებსა და ბიზნესებს, კომპანიებს, რომლებიც ჩართულნი არიან როგორც ადამიანის უფლებათა დარღვევაში, ასევე კორუფციაში“.
მელანი ჯოლის თქმით, ამ საკითხზე უახლოეს დღეებში მეტს ისაუბრებს.
საქართველოს პრეზიდენტი სალომე ზურაბიშვილი აცხადებს, რომ დღევანდელ ღამეს მოვლენები „შემაშფოთებლად განვითარდა“: „მშვიდობიანი დემონსტრაციები სულ ახალი დაწყებული იყო, როდესაც დარბევა დაიწყო“.
პრეზიდენტის შეფასებით, „ეს არის თავდასხმა გამოხატვის თავისუფლებასა და პროტესტის უფლებაზე“. „დარღვეულია ძირითადი უფლებები, რომ აღარაფერი ვთქვათ იმაზე, თუ როგორ აპატიმრებენ და ეპყრობიან ადამიანებს დაკავებისას“, - წერს იგი პლატფორმა X-ზე.
პრეზიდენტი ასევე წერს, რომ „საქართველოს მასშტაბით ხალხი წინ აღუდგა რუსულ მარიონეტულ რეჟიმს“.
„დედაქალაქიდან ყველაზე პატარა ქალაქებამდე, ასეთი მოძრაობა არ ახსოვს ჩვენს ისტორიას. გზავნილი ნათელია: დამიბრუნე ჩემი ხმა! დამიბრუნე ჩემი ევროპული მომავალი“! - წერს პრეზიდენტი ზურაბიშვილი.
სპეცრაზმის მხრიდან სპეციალური საშუალებების გამოყენების მიუხედავად, თბილისის ცენტრში პროევროპული აქცია გრძელდება.
რუსთაველი
ფორუმი