კორონავირუსი საქართველოში - განახლებადი ინფორმაცია

პაატა იმნაძე: ფარი უნდა ვიხმაროთ ნიღაბთან ერთად

საქართველოს დაავადებათა კონტროლისა და საზოგადოებრივი ჯანდაცვის ცენტრის დირექტორის მოადგილე, პაატა იმნაძე მოსახლეობას ახალი კორონავირუსისგან დამცავი ფარის სწორად გამოყენებას ურჩევს. მისი განმარტებით, მხოლოდ ფარი საკმარისი არ არის და მასთან ერთად საჭიროა ნიღაბიც:

"რამდენადაც ჩემთვის ცნობილია, ჩვენთან საქართველოში უკვე არის ადგილობრივი წარმოება ფარების. რაც ძალიან სასიხარულოა, მაგრამ ძალიან ვთხოვ ყველას, ეს ფარები იხმარონ სწორად. ჯერ ერთი მარტო ფარი ვერ იცავს, ფარი უნდა ვიხმაროთ ნიღაბთან ერთად, ანუ ნიღაბიც უნდა გვეკეთოს, ფარიც უნდა გვეკეთოს და ფარი უნდა იყოს სახეზე ჩამოფარებული. ამიტომ ჰქვია მას ფარი და ფარი არ არის ქუდი, არ უნდა იყოს აწეული", - განაცხადა პაატა იმნაძემ.

ერთ დღე-ღამეში 286 ადამიანი 3000 ლარით დაჯარიმდა

შინაგან საქმეთა სამინისტროს ინფორმაციით, ბოლო 24 საათში 286 პირი საგანგებო მდგომარეობის წესების დარღვევისთვის 3000 ლარით დაჯარიმდა. დღე-ღამეში ჯამში 858 ათასი ლარის ჯარიმა გამოიწერა.

ჯარიმის გამოწერის მიზეზები:

• ე.წ. კომენდანტის საათის დარღვევისთვის - 136 მოქალაქე;
• საჯარო სივრცეში 3-ზე მეტი პირის შეკრების შეზღუდვისა და 2-მეტრიანი სოციალური დისტანციის დაუცველობის გამო - 82 მოქალაქე;
• თვითიზოლაციის წესების დარღვევისთვის - 9 პირი;
• მგზავრთა გადაყვანის წესებისთვის - 59 პირი.

დარღვევის გამეორების შემთხვევაში ყველა მათგანს პატიმრობა ემუქრება.

ჯანდაცვის მინისტრი: აგრესიული ტესტირება პრიორიტეტია, მაგრამ გააჩნია კონკრეტული დრო

ჯანდაცვის მინისტრის ეკატერინე ტიკარაძის განმარტებით, აგრესიული ტესტირება პრიორიტეტია, მაგრამ ამისთვის აუცილებელია ინფიცირებულთა ზუსტი გამოვლენა. ამასთან, როგორც მან განაცხადა საკოორდინაციო საბჭოს სხდომის დასრულების შემდეგ, პირველ ეტაპზე მედპერსონალის ტესტირება დაიწყება.

„აგრესიული ტესტირების შედეგად, ამ ეტაპისთვის რადიკალურ ზრდას არ ველოდებით. ის, რომ ჩვენ შევცვალეთ ალგორითმი და უკვე გარკვეულ მიზნობრივ ჯგუფებსაც ვიკვლევთ, ისეთებს, როგორიცაა მედპერსონალი, არის პირველი ნაბიჯი იმისკენ, რომ ჩვენ აგრესიული ტესტირება დავიწყეთ, ოღონდ მიზნობრივ ჯგუფებში“, - განაცხადა ეკატერინე ტიკარაძემ.

მისი სიტყვებით, აგრესიული ტესტირება ეტაპობრივად გაფართოვდება კლასტერების ამოსაცნობად და გამოსაკვლევად.

„პანდემიასთან ბრძოლას გააჩნია გარკვეული გრადაცია, რასაც ჩვენ ძალიან მკაცრად ვაკვირდებით და ვაკონტროლებთ. ყოველ ნაბიჯზე იცვლება ალგორითმები და პრიორიტეტები. აგრესიული ტესტირება პრიორიტეტია ჩვენთვის, უბრალოდ მასაც გააჩნია კონკრეტული დრო და სივრცე - სად და როდის უნდა განხორციელდეს იმისათვის, რომ მაქსიმალური ეფექტი მივიღოთ. ვადასტურებ, რომ სახელმწიფოსთვის, სამინისტროსთვის და დაავადებათა კონტროლის ეროვნული ცენტრისთვის ეს არის ძალიან მნიშვნელოვანი ინსტრუმენტი“, - განაცხადა ეკატერინე ტიკარაძემ.