188 ინფიცირებულიდან ორმხრივი პნევმონია 81 პაციენტს განუვითარდა
როგორც ჯანდაცვის მინისტრმა ეკატერინე ტიკარაძემ განაცხადა უწყებათაშორისო საკოორდინაციო საბჭოს სხდომის დასრულების შემდეგ გამართულ ბრიფინგზე, კორონავირუსით COVID 19-ით ინფიცირებული 188 პაციენტიდან პნევმონია 81 -ს განუვითარდა.
„ჩვენ გვქონდა დაფიქსირებული 188 პაციენტიდან 81 ადამიანზე ორმხრივი პნევმონია, რომელთაგანაც 8 ადამიანს დასჭირდა სუნთქვითი მხარდაჭერა. ამ ეტაპზე კლინიკებში იმყოფება 6 პაციენტი, რომელსაც კვლავ ესაჭიროება სუნთქვითი მხარდაჭერა. 3 საუნივერსიტეტო კლინიკაშია, 1 ბათუმში, 1 გორში და 1 ინფექიურ საავადმყოფოში“,- განაცხადა ეკატერინე ტიკარაძემ.
მისი სიტყვებით, საქართველოში არის 700 სასუნთქი აპარატი, რაც სრულიად საკმარისია პაციენტთა უსაფრთხო გამოჯანმრთელებაზე ზრუნვისთვის.
საქართველოში ლაბორატორიულად დადასტურებულია COVID-19-ის 188-ს შემთხვევა მათგან 2 ადამიანი გარდაიცვალა.
6 აპრილის 13:10 საათის მონაცემებით, 188-დან 36 უკვე გამოჯანმრთელდა.
კარანტინის რეჟიმშია 5056 ადამიანი და სტაციონარში მეთვალყურეობის ქვეშ - 386.
პაატა იმნაძე მორწმუნეებს: ილოცეთ სახლში, დავიცვათ ჩვენი დედაეკლესია და ჩვენი მღვდელმთავრები
საქართველოს დაავადებათა კონტროლისა და საზოგადოებრივი ჯანდაცვის ეროვნული ცენტრის დირექტორის მოადგილე პაატა იმნაძე მორწმუნეებს მოუწოდებს, სახლში ილოცონ და რელიგიურ დღესასწაულებზე ეკლესიებში არ მივიდნენ:
„მე მინდა მივმართო მორწმუნე ქრისტიანებს. მე მინდა მივმართო მრევლს. დავიცვათ ჩვენი დედაეკლესია და დავიცვათ ჩვენი მღვდელმთავრები ეკლესიაში არმისვლით.
სახლში ლოცვით დავიცვათ არა მარტო ამ ვირუსისაგან, არამედ სხვა ვირუსებისგანაც. დავიცვათ ჩვენი ეკლესია. ნუ მიხვალთ ეკლესიაში სალოცავად, ილოცეთ სახლში.
ეკლესიის კარი ვერ დაიკეტება, იქ იქნებიან მამაოები, რომლებიც ილოცებენ ჩვენთვის. ჩვენ სახლში ვილოცოთ ერთმანეთისათვის და ჩვენი ქვეყნისათვის“, - განაცხადა პაატა იმნაძემ 6 აპრილს, საკოორდინაციო საბჭოს სხდომის დასრულების შემდეგ გამართულ ბრიფინგზე.
კორონავირუსის მკურნალობის ხარჯებზე სადაზღვევოებთან მოლაპარაკება დაიწყება
ამ ეტაპზე კოვიდინფექციის მკურნალობის ხარჯებს მთლიანად სახელმწიფო ფარავს, თუმცა სადაზღვევო კომპანიებთან ფინანსურ მხარდაჭერაზე მოლაპარაკებები გაიმართება, - განაცხადა ჯანდაცვის მინისტრმა, ეკატერინე ტიკარაძემ უწყებათაშორისი საკოორდინაციო საბჭოს სხდომის დასრულების შემდეგ გამართულ ბრიფინგზე.
მინისტრის განცხადებით, შესაძლოა, სადაზღვევო კომპანიები ონლაინმომსახურების გაძლიერებაში ჩაერთონ.
„დღევანდელ ეტაპზე კოვიდინფექციის მკურნალობას ფარავს სრულად სახელმწფო, თუმცა არსებობს მოსაზრებები, რომ ჩაერთონ როგორც ონლაინმომსახურებაში, თვითონ ონლაინხაზის გასაძლიერებლად, ასევე ფინანსურ მხარდაჭერაში კერძო სადაზღვევოები. ამასთან დაკავშირებით ჩვენ გავმართავთ მოლაპარაკებებს და მას შემდეგ გახდება ცნობილი, რა ერთობლივ გადაწყვეტილებას მივიღებთ სადაზღვევოებთან ერთად“, - განაცხადა ეკატერინე ტიკარაძემ.
პაატა იმნაძე: ხიბლში ნუ ჩავვარდებით, წიწილებს შემოდგომაზე ითვლიან
დაავადებათა კონტროლისა და საზოგადოებრივი ჯანდაცვის ცენტრის დირექტორის მოადგილის პაატა იმნაძის თქმით, ახალი კორონავირუსის წინააღმდეგ ბრძოლის საკუთარ მეთოდებსა და გამოცდილებაზე საქართველოს კომუნიკაცია აქვს ჯანდაცვის მსოფლიო ორგანიზაციასთან და სხვადასხვა ქვეყნის წარმომადენლებთან:
„რა თქმა უნდა,ძირითადად, კომუნიკაცია მიმდინარეობს ჯანმრთელეობის მსოფლიო ორგანიზაციასთან. ასევე ქსელი გვაქვს შექმნილი, რომელსაც ჰქვია „აბრეშუმის გზის ეპიდზედამხედველობის ქსელი“. ამ ქსელის მეშვეობით კავშირები გვაქვს ჩვენს მეზობელ ქვეყნებთან, ასევე ცენტრალური აზიის ქვეყნებთან, ჩვენს უკრაინელ კოლეგებთან.
რა თქმა უნდა ყველაფრის გაზიარება ხდება მუდმივად, მაგრამ ხიბლში ნუ ჩავვარდებით. ჯერ, ძირითადი ბრძოლა წინ გვაქვს. ასე, რომ ჩვენ ყველა ერთმანეთს ვუზიარებთ გამოცდილებას და წიწილებს კიდევ, შემოდგომაზე ითვლიან , - განაცხადა პაატა იმნაძემ ერთ-ერთი მედიასაშუალების შეკითვაზე, უზიარებს თუ არა საქართველო კორონავირუსის წინააღმდეგ ბრძოლის თავის წარმატებულ გამოცდილებას სხვა ქვეყნებსაც.