კორონავირუსი საქართველოში - განახლებადი ინფორმაცია

ბოჭორიშვილის კლინიკაში ახალი კორონავირუსით დაინფიცირებულთა შორის არის 17 წლის მოზარდიც

თბილისის ბოჭორიშვილის სახელობის კლინიკაში ახალი კორონავირუსით დაინფიცირებული 4 პაციენტი მკურნალობს, მათ შორისაა 17 წლის მოზარდი. იგი ამერიკის კლასტერს განეკუთვნება. ახალი კორონავირუსით მისი ოჯახის 3 წევრია დაავადებული:

„ეს არის ამერიკის კლასტერი. ჩამოფრენისთანავე ეგ ოჯახი იმყოფებოდა თვითიზოლაციაში, შემდგომ ოჯახის 3 წევრს დაუდასტურდა დაავადება. ოჯახის მე-4 წევრი იმყოფებოდა თვითიზოლაციაში და როგორც კი დაიწყო სიმპტომატიკა, დაუდასტურდა უკვე მასაც დიაგნოზი“, - უთხრა ჟურნალისტებს ბოჭორიშვილის კლინიკის სამეთვალყურეო საბჭოს თავმჯდომარემ მაკა სოლოღაშვილმა.

მისი განმარტებით, ბოჭორიშვილის სახელობის კლინიკის ბოქსირებულ განყოფილებაში 17 პაციენტია განთავსებული, გუშინ კვლევაში 6 პაციენტი იყო, მათგან ახალ კორონავირუსზე დადებითი ტესტი ერთს აღმოაჩნდა, ამ დროისათვის კლინიკაში ახალი კორონავირუსით დაინფიცირებული 4 პაციენტი მკურნალობს.

თურნავა: კარანტინის ზონაში ეკონომიკური საქმიანობა მხოლოდ ღია საწარმოებში იქნება დაშვებული

საქართველოს ეკონომიკისა და მდგრადი განვითარების მინისტრის, ნათია თურნავას განმარტებით, ახალი კორონავირუსის გავრცელების მკაცრ საკარანტინო ზონაში, კერძოდ, მარნეულისა და ბოლნისის მუნიციპალიტეტებში, ყველა სახის ეკონომიკური საქმიანობა აკრძალულია, თუმცა გარკვეული გამონაკლისები მაინც შეიძლება დაიშვას. კერძოდ, მინისტრის განმარტებით, მიღებულ იქნა გადაწყვეტილება, ფუნქციონირების უფლება მიეცეთ ისეთ საწარმოებს, რომლებიც სამუშაო პროცესს ღია სივრცეში ახორციელებენ:

„მაგალითად, ისეთი წარმოებები, როგორებიცაა კარიერების დამუშავება, ქვიშა-ხრეშის მოპოვება, საშენ მასალათა წარმოება, რომელიც ხორციელდება ღია სივრცეში და ბიზნესის სხვა ისეთი საქმიანობა, რომელიც არის ღია სივრცეში განლაგებული“, - განაცხადა ნათია თურნავამ. მისი განმარტებით, მარნეულისა და ბოლნისის მუნიციპალიტეტებში ეკონომიკური საქმიანობის დაშვების კონკრეტული სია უახლოეს საათებში გამოქვეყნდება.

მინისტრის თანახმად, საქართველოს მასშტაბით ეკონომიკური საქმიანობა ძირითადად გრძელდება, მაგრამ ეპიდემიოლოგების მიერ დაწესებული წესების დაცვის პირობებში.

ახალი კორონავირუსის გავრცელების მასშტაბების შემცირების მიზნით საქართველოში ერთთვიანი საგანგებო მდგომარეობაა გამოცხადებული. მარნეულისა და ბოლნისის მუნიციპალიტეტები მკაცრი საკარანტინო ზონაა.

საქართველოს მთავრობა კვლავ განმარტავს, სად იკრძალება 10-ზე მეტი პირის თავშეყრა

კორონავირუსის COVID-19 გავრცელების გამო, საქართველოს პრემიერ-მინისტრის ხელმძღვანელობით მოქმედი საკოორდინაციო საბჭოს დღევანდელი სხდომის შემდეგ, პრემიერის პრესსპიკერმა ირაკლი ჩიქოვანმა კიდევ ერთხელ განმარტა, თუ სად იკრძალება 10-ზე მეტი პირის თავშეყრა ქვეყანაში გამოცხადებული საგანგებო მდგომარეობის დროს.

- აიკრძალა შეკრება და მანიფესტაცია, საჯარო სივრცეში 10-ზე მეტი პირის თავშეყრა;

- საჯარო სივრცე ნიშნავს ნებისმიერ ადგილს როგორც გარეთ, ასევე შენობებში. ეს არ ეხება მხოლოდ კერძო პირის საცხოვრებელ ადგილს;

- აიკრძალა ყველა ტიპის სოციალური ღონისძიება, რომელიც 10-ზე მეტი პირის შეკრებას ითვალისწინებს. ისეთები, როგორიცაა სხვადასხვა სარიტუალო ღონისძიებები;

- 10-ზე მეტი პირის თავშეყრა დასაშვებია იმ კერძო დაწესებულებებში, რომლებიც აგრძელებენ მუშაობას, ისინი ვალდებულნი არიან დაიცვან 2-მეტრიანი სოციალური დისტანცია და დაემორჩილონ ჯანდაცვის სამინისტროს რეკომენდაციებს.

10-ზე მეტი პირის თავშეყრა დასაშვებია:

- საზოგადოებრივ ტრანსპორტში, თუ მას არ შეუჩერდა საქმიანობა საგანგებო მდგომარეობის გამო;

- სამედიცინო დაწესებულებებში;

- საჯარო დაწესებულებებში;

- თავდაცვის ძალებში;

- პენიტენციურ დაწესებულებებში;

- თავშეყრის შეზღუდვა არ ეხება სამშენებლო, ინფრასტრუქტურული სამუშაოების შესრულებას.

საქართველოში საგანგებო მდგომარეობა 21 აპრილამდეა გამოცხადებული.

გაბუნია: კორონავირუსის გავრცელების პიკი, დიდი ალბათობით, გადავადდება და შესაძლოა, არც იყოს

საქართველოს ჯანდაცვის მინისტრის მოადგილის, თამარ გაბუნიას თანახმად, ახალი კორონავირუსის გავრცელების პიკი საქართველოში, სავარაუდოდ, გადავადდება და შესაძლებელია, არც დადგეს.

„სხვადასხვა მოდელი ამბობს, რომ პიკი მოსალოდნელია, თუ არაფერს არ გავაკეთებთ, მეშვიდე-მერვე კვირაზე პირველი შემთხვევების გამოვლენიდან.

ამ შემთხვევაში ჩვენ უნდა გავითვალისწინოთ ის, რომ არის აქტიური სოციალური დისტანცირება და მთელი რიგი ღონისძიებები. ამრიგად, მეშვიდე-მერვე კვირის პიკი, დიდი ალბათობით, გადავადდება და ჩვენ შეიძლება არც არასდროს არ მივიღოთ ეს პიკი და ჩვენი მიზანიც ეს არის“, - უთხრა თამარ გაბუნიამ ჟურნალისტებს.

მისი თქმით, თუ დაინფიცირების შემთხვევების მატება მაინც აღინიშნება, მაშინ საუკეთესო იქნებოდა, ეს მატება და გამოვლენა მოხდეს ეტაპობრივად და ნელა.