კორონავირუსით ინფიცირებულთა რაოდენობა 48-მდე გაიზარდა
21 მარტის 15 საათის მონაცემებით, საქართველოში კორონავირუსით ინფიცირების 48 შემთხვევაა აღრიცხული.
ამის შესახებ ინფორმაცია მთავრობის მიერ შექმნილ სპეციალურ ვებგვერდზე stopcov.ge-ზე გამოქვეყნდა.
21 მარტს საქართველოში კორონავირუსის 4 ახალი შემთხვევა გამოვლინდა.
ამჟამად კარანტინის რეჟიმში 1966 ადამიანია, ხოლო სტაციონარში მეთვალყურეობას 259 ადამიანი გადის.
საქართველოს პრეზიდენტმა ქვეყნის მასშტაბით, საგანგებო მდგომარეობა გამოაცხადა.
პრეზიდენტის დეკრეტი საგანგებო მდგომარეობის შესახებ
საქართველოს პრეზიდენტი, სალომე ზურაბიშვილი აქვეყნებს დეკრეტს ქვეყნის მთელ ტერიტორიაზე საგანგებო მდგომარეობის გამოცხადების შესახებ, სადაც ჩამოთვლილია, ყველა ის ღონისძიება, რომელიც საგანგებო მდგომარეობის პერიოდში უნდა იყოს გატარებული.
პარლამენტმა მხარი დაუჭირა საგანგებო მდგომარეობის გამოცხადებას
პარლამენტმა კენჭი უყარა პრეზიდენტის მიერ წარდგენილ დეკრეტს საგანგებო მდგომარეობის გამოცხადების შესახებ და 115 მომხრით მხარი დაუჭირა საქართველოს მთელ ტერიტორიაზე საგანგებო მდგომარეობის გამოცხადებას, წინააღმდეგი 2 დეპუტატი იყო.
დახმარებაზე ცხინვალის უარი საერთაშორისო ორგანიზაციებს
ცხინვალის ქუჩებში მილიციის თანამშრომლები გამოჩნდნენ. ისინი სკვერებსა და ქუჩებში შეკრებილებს მოუწოდებენ, რომ გარეთ დიდხანს არ იყვნენ და მეტი დრო სახლში გაატარონ. ადგილობრივი ხელისუფლება ამ რეიდებს ინფექციური დაავადებების პრევენციით ხსნის, თუმცა, ამავე დროს, ოლიმპიურ სასახლეში ატარებს მასობრივ ტურნირს თავისუფალ ჭიდაობაში. რადიო თავისუფლების ცხინვალელი წყარო გვიყვება, რომ ამ დღესთან დაკავშირებით ცხინვალში რუსეთიდან სტუმრებიც დიდი რაოდენობით ჩავიდნენ.