პაატა იმნაძე: ბავშვები შესაძლოა, იყვნენ გავრცელების წყარო ბაბუებისა და ბებიებისთვის
დაავადებათა კონტროლის ეროვნული ცენტრის დირექტორის მოადგილე პაატა იმნაძე განმარტავს, რომ ამ ეტაპზე შეუძლებელია იმის თქმა, რომ საქართველოში პროცენტულად მაღალია კორონავირუსით COVID-19 ბავშვების დაავადების მაჩვენებელი.
მთავრობის ადმინისტრაციაში საკოორდინაციო საბჭოს დღევანდელი სხდომის დასრულების შემდეგ გამართულ ბრიფინგზე პაატა იმნაძემ თქვა, რომ როცა ქვეყანაში დაავადების შემთხვევები 40-იც არ არის, სტატისტიკაზე ლაპარაკი არასერიოზულია: „როდესაც ჩინეთმა გამოაქვეყნა სტატისტიკა 75 000 შემთხვევაზე, იქიდან შეიძლება გამოიყვანო სტატისტიკა“.
პაატა იმნაძის განცხადებით, ბავშვები, საბედნიეროდ, რჩებიან დაბალი რისკის კატეგორიაში როგორც დაავადების მიღების, ისე სიმძიმის თვალსაზრისით: „თუმცა, ბავშვები რისკს წარმოადგენენ დაავადების გავრცელებასთან დაკავშირებით. რადგან მათ თვითონ ძალიან მსუბუქად გადააქვთ, ამიტომ ისინი შეიძლება იყვნენ დამატებითი წყარო გავრცელების იგივე, ბაბუებისა და ბებიებისთვის“.
თბილისის მერიის მომსახურების ცენტრები მუშაობას წყვეტენ
თბილისის მერის კახა კალაძის განცხადებით, დროებით ფუნქციონირებას წყვეტს მერიის რაიონული მომსახურების ცენტრები. მუშაობას მხოლოდ მერიის ცენტრალური ოფისის სერვისცენტრი გააგრძელებს, რომლის პერსონალიც უკონტაქტო მომსახურებაზე გადავა.
„მომსახურების ახალი წესის თანახმად, ცენტრალური სერვისცენტრის მისაღებში, აღარ მოხდება მოქალაქეების თავშეყრა, არამედ ისინი რიგს დაიკავებენ გარეთ და მხოლოდ რამდენიმე ადამიანს შეეძლება მისაღებში ერთდროულად შესვლა. მისაღებში მოქალაქეებს, ნაცვლად პერსონალისა, დახვდებათ თემატური ბლანკები, რომელსაც შეავსებენ და შესაბამის თემატურ ყუთებში განათავსებენ. რის შემდეგაც შესაბამისი სამსახურები გაეცნობიან წერილს და მოახდენენ რეაგირებას“, - განაცხადა კახა კალაძემ ბრიფინგზე.
მისივე სიტყვებით, ჯანდაცვისა და სოციალური უზრუნველყოფის მიმართულებით სერვისების მიწოდებისთვის მერიის შენობის პირველ სართულზე გამოიყო იზოლირებული სივრცე, სადაც მერიის თანამშრომლები უსაფრთხოების წესების დაცვით მოემსახურებიან მოქალაქეებს.
კალაძის სიტყვებით, „ტაქსების ლიცენზირებასთან დაკავშირებული მომსახურების მიღება მხოლოდ ელექტრონული წესით იქნება შესაძლებელი“.
ირაკლი ჩიქოვანი: შემუშავდება 7 ძირითად პროდუქტზე ფასების შენარჩუნების მექანიზმი
საქართველოს პრემიერ-მინისტრის მრჩევლის, ირაკლი ჩიქოვანის თანახმად, გიორგი გახარიამ საკოორდინაციო საბჭოს სხდომაზე საქართველოს სოფლის მეორნეობის მინისტრს დაავალა, დაიწყოს ბიზნესთან კონსულტაციები, რათა 7 ძირითად პროდუქტზე ფასები შენარჩუნდეს და მკვეთრ ცვლილებებს არ დაექვემდებაროს:
„შესაბამისად სოფლის მეურნეობა ბიზნესთან კონსულტაციით დაიწყებს მუშაობას მექანიზმზე “, - განაცხადა ირაკლი ჩიქოვანმა. მისი ინფორმაციით, შეიქმნება მექანიზმი, რომელიც საშუალებას მისცემს მოსახლეობას მაქსიმალურად ნაკლებად ცვალებადი ფასებით შეეძლოს ძირითადი პროდუქტების შეძენა.
ირაკლი ჩიქოვანს არ დაუსახელებია, რომელ 7 მთავარ პროდუქტზე იყო მსჯელობა საკოორდინაციო საბჭოს ეკონომიკური გუნდის 18 მარტის შეხვედრაზე.
თელავში კიდევ ერთი საკარანტინო სივრცე გაიხსნა
კორონავირუსის COVID-19 მასობრივად გავრცელების პრევენციის მიზნით, თელავში მოეწყო კიდევ ერთი საკარანტინო ზონა. 18 მარტის მდგომარეობით, ქალაქის სამ სასტუმროში, საკარანტინო სივრცეში იმყოფება საერთო ჯამში 160 ადამიანი. კახეთის რეგიონში თვითიზოლაციაშია 198.
დაავადებათა კონტროლისა და საზოგადოებრივი ჯანმრთელობის ეროვნული ცენტრის კახეთის განყოფილების უფროსის, ნელი ხიზანიშვილის ინფორმაციით, თვითიზოლაციის წესების დარღვევისთვის პოლიციამ საკარანტინო სივრცეში იძულებით გადაიყვანა სამი პირი.
ნელი ხიზანიშვილის ცნობით, წუხელ, საქართველო-აზერბაიჯანის სასაზღვრო-გამშვები პუნქტიდან თბილისის ინფექციურ საავადმყოფოში გადაიყვანეს საქართველოს 5 მოქალაქე, რომლებსაც მაღალი ტემპერატურა ჰქონდათ.