კორონავირუსმა ევროკავშირის საზღვრები ჩაკეტა
კორონავირუსის COVID-19 პანდემიის გამო ევროკავშირის სახელმწიფოებმა საზღვრები დაკეტეს. სულ მცირე 30 დღის განმავლობაში ევროკავშირის ტერიტორიაზე შესვლა აეკრძალათ მესამე ქვეყნების მოქალაქეებს.
ევროკავშირის სახელმწიფოებში ჩასვლა შეუძლიათ მხოლოდ მათ მოქალაქეებს და ასევე, დიდი ბრიტანეთის, ისლანდიის, ლიხტენშტეინის, ნორვეგიის და შვეიცარიის მოქალაქეებს და ბინადრობის უფლების მქონე პირებს. აკრძალვა არ ეხება სატვირთო გადაზიდვებს.
მსოფლიო ჯანდაცვის ორგანიზაციამ ევროპა კორონავირუსის პანდემიის ეპიცენტრად გამოაცხადა.
ყველაზე მძიმე ვითარება იტალიაშია, სადაც 18 მარტის დილის მონაცემებით, სულ დაავადდა 31 506 ადამიანი. მათგან გამოჯანმრთელებულია 2 941. გარდაცვლილია 2 503 ადამიანი. კორონავირუსის გავრცელების მასშტაბით, მსოფლიოს ქვეყნების პირველ ათეულში არიან ესპანეთი, გერმანია, საფრანგეთი, შვეიცარია და დიდი ბრიტანეთი.
საქართველო უცხო ქვეყნების მოქალაქეებისთვის ჩაიკეტა
დღეიდან, 18 მარტიდან საქართველოში ჩამოსვლა სულ მცირე ორი კვირით აეკრძალათ უცხო ქვეყნების მოქალაქეებს.
საქართველოს მთავრობამ საზღვრის დაკეტვის გადაწყვეტილება 16 მარტს მიიღო კორონავირუსის COVID-19 მასობრივად გავრცელების პრევენციის მიზნით.
აკრძალვა არ ეხებათ საქართველოში აკრედიტებული დიპლომატიური კორპუსის და საერთაშორისო ორგანიზაციების წარმომადგენლებს და მათი ოჯახის წევრებს, შერეულ ოჯახებს, რომლის ერთი წევრი საქართველოს მოქალაქეა, ჰუმანიტარული მისიით ჩამოსულ პირებს და ლტოლვილის, ან ნეიტრალური სტატუსის მქონე პირებს.
საქართველოში გაიზარდა კარანტინსა და სტაციონარში მყოფთა რიცხვიც
18 მარტის 11:00 საათის მდგომარეობით, საქართველოში კარანტინის რეჟიმში იმყოფება 1130 ადამიანი. 17 მარტის მონაცემებით, ეს რიცხვი 1008 იყო.
64-დან 81-მდე გაიზარდა სტაციონარში მეთვალყურეობის ქვეშ მყოფი პაციენტების რაოდენობა.
ეს ინფორმაცია გამოქვეყნებულია კორონავირუსის COVID-19 გავრცელების პრევენციის მიზნით შექმნილ სამთავრობო საიტზე stopcov.ge.
18 მარტს, დილით საქართველოში დადასტურდა ვირუსით ინფიცირების 4 ახალი შემთხვევა. დაავადებულთა საერთო რიცხვი 38-მდე გაიზარდა. მათგან ერთი გამოჯანმრთელდა.
მარინა ეზუგბაია: კორონავირუსით ბავშვთა დაავადების პროცენტი შედარებით მაღალია
კორონავირუსით COVID-19 დაავადებული 14 წლამდე ასაკის 4 პაციენტის მდგომარეობა სტაბილურია და დაავადების პროგრესირება არ შეიმჩნევა. ამის შესახებ მედიას დღეს, 18 მარტს უთხრა თბილისის ინფექციური საავადმყოფოს სამედიცინო დირექტორმა, მარინა ეზუგბაიამ.
შეკითხვას, აქვს თუ არა საქართველოს არასრულწლოვანთა ინფიცირების მაღალი პროცენტი, მარინა ეზუგბაიამ უპასუხა: „პრინციპში ჩაითვლება ეს შედარებით მაღალ პროცენტად სხვა ქვეყნებისგან განსხვავებით. მაგრამ თუ არ შემოგვემატება ბავშვთა ასაკი, თავისთავად ეს პროცენტი დაიწევს და გაუთანაბრდება იმ მონაცმებეს, რაც დადებულია სხვა ქვეყნებში“.