საქართველოს დამოუკიდებლობის დღე აღნიშნეს საზღვარგარეთაც. ევროპის 30-მდე ქალაქში ემიგრანტები საქართველოს დროშებით გამოვიდნენ.

26 მაისის აღნიშვნა ქართველებმა საზღვარგარეთ 24 მაისიდან, შაბათ-კვირიდან დაიწყეს. მოძრაობა „ქარებმა“ სხვადასხვა ქალაქებში დაგეგმეს აქციები „ვერთიანდებით თავისუფლებისთვის“. მოძრაობამ „თაობები საქართველოსთვის “ წამოიწყო კამპანია, „ვაფერადებთ საქართველოს“, რომელსაც ასევე ბევრი ემიგრანტი შეუერთდა.

„შავ ფერზე გამოხატული იყო ტოტალიტარიზმი, რომელიც ემიგრანტებმა ვაფერადეთ. მრავალფეროვნებაზეა დაფუძნებული ლიბერალობა და დემოკრატია, რომელსაც ვერაფრით მივაღწიეთ და ამასობაში დამოუკიდებლობაც გაგვიხდა დასაცავი. ღამეები ვათიეთ და რუსთაველზეც გავაკეთეთ კოლაჟი, რომ იცოდეს ხალხმა - ემიგრაცია მათ გვერდითაა“, - ამბობს რევაზ ბეროზაშვილი ბრიუსელიდან.

ჰანოვერში ტოტალიტარიზმის გაფერადება წვიმაში მოუწიათ.

კვიპროსში საქართველოს საელჩოს წინ შეიკრიბნენ.

აქციას ავსტრალიიდანაც შეუერთდნენ.

პრაღაში ემიგრანტები 2 ნოემბრიდან მოყოლებული ყოველ კვირა აქციაზე დგანან. ისინი “პოლიტპატიმრების გათავისუფლებასა“ და „ქართული ოცნების“ საპატიო თავმჯდომარის, ბიძინა ივანიშვილის სანქცირებას” ითხოვენ.

„ვთხოვთ ჩეხეთის რესპუბლიკას, ევროპარლამენტს თვალი ადევნონ საქართველოში მიმდინარე მოვლენებს, მხარი დაუჭირონ ქართველ ხალხს, საბანკო სისტემიდან ჩახსნან „ქართუ ბანკი“, დაასანქცირონ შსს-ს ის მაღალჩინოსნები, რომლებიც რუსული რეჟიმის პოლიტიკას ატარებენ“, - ეუბნება რადიო თავისუფლებას ემიგრანტი ალექსი პეტრიაშვილი.

ეკა კაჭარავა, რომელიც ორ ათეულ წელზე მეტია საზღვარგარეთ ცხოვრობს, ჰყვება, რომ საქართველოში მიმდინარე მოვლენები დღემდე ძალიან ადარდებს. 25 მაისს ისიც აქციაზე იდგა, რომში.

„ძალიან განვიცდით, ყველაფრის ხალისი მაქვს დაკარგული. სულ მგონია, რომ ახლა დაწყნარდება, ახლა დაწყნარდება და არა. 23 წელია წამოსული ვარ, შვილი აქ გამიჩნდა, მეუღლეც აქეთაა. სანამ შვილი სკოლაში შევიდოდა, ვამბობდი, დავბრუნდები-მეთქი, მაგრამ არასდროს შეიქმნა საქართველოში ისეთი სიტუაცია, რომ დავბრუნებულიყავი“, - ამბობს ეკა კაჭარავა.

„სოლიდარობას ვუცხადებთ თავისუფლების შესანარჩუნებლად მებრძოლ დემონსტრანტებს, პატიმრებსა და ჟურნალისტებს! ფასდაუდებელია თქვენი ღვაწლი, რაც უკვალოდ არ ჩაივლის“, - თქვეს აქციის მონაწილეებმა კიოლნში.

26 მაისი იზეიმეს ბერნში - საქართველოს დიასპორა შვეიცარიაში აქტივისტების ჯგუფმა „საფიხვნომ“ და პოლიტიკურმა ორგანიზაცია „დასმა“ შეკრიბა.

„ჩვენთან სტუმრად იყო შვეიცარიის პარლამენტარი ფაბიან მოლინა, რომელმაც საოცრად მხურვალე სიტყვა წარმოთქვა - მე სხვა ღონისძიებაზე ვიყავი დღეს, 26 მაისს, დაპატიჟებული, მაგრამ ვიცოდი, სად უნდა მივსულიყავიო. ასევე იყო გიუნტერ ბეხლერი, შვეიცარიის ყოფილი ელჩი საქართველოში. თავის დროზე ის ახალარჩეულ „ქართულ ოცნებას“ ევროპაში პოზიციონირებაში ეხმარებოდა, დღეს კი ჩვენთან მოვიდა. ისიც ზუსტად ისე აფასებს საქართველოში მიმდინარე მოვლენებს, როგორც ჩვენ“, - ამბობს ირმა მგელაძე, ბერნის შეკრების მონაწილე.

ორგანიზაცია „გზამ“ ბერლინში გამართა დისკუსია თემაზე სამოქალაქო აქტივიზმი საქართველოში და მის ფარგლებს გარეთ.

რევაზ ბეროზაშვილი ფიქრობს, რომ ემიგრანტების ბრძოლა საზღვარგარეთ უფრო შედეგიანია, ვიდრე საქართველოში მყოფების.

„ყოველდღიურად გვაქვს მოლაპარაკებები დასავლეთ პარტნიორებთან. ჩვენი პეტიციების საფუძველზე ხდება ეს სანქციები. მეორე მხრივ, საქართველოში არ ჩანს ცვლილებები. გაერთიანება უნდა მოვახერხოთ. ჩვენ უნდა გავერთიანდეთ ერთი იდეის ირგვლივ, რომ ეს რეჟიმი წავიდეს“, - ამბობს ბეროზაშვილი.

26 მაისი საზღვარგარეთ საქართველოს დიპლომატიურმა მისიებმაც აღნიშნეს.

ტოკიოში საქართველოს დამოუკიდებლობის დღისადმი მიძღვნილი საზეიმო მიღება გაიმართა.

ბრიუსელის ბიჭუნას ისევ ჩოხა ჩააცვეს.

იტალიაში კი ქართული დროშები გამოფინეს.

საქართველოს დროშის ფერებში განათდა შენობები მრავალ ქალაქში, მათ შორის შადრევანი ათენში.

26 მაისს საქართველოში დამოუკიდებლობის დღე აღინიშნება. ეროვნულმა საბჭომ 1918 წლის 26 მაისს გამოაცხადა დამოუკიდებლობა. საქართველოს პირველმა, დამოუკიდებელმა რესპუბლიკამ იარსება სამი წლის განმავლობაში, საბჭოთა რუსეთის ოკუპაციამდე. 1991 წლის 9 აპრილს საქართველოს დამოუკიდებლობა აღადგინა საქართველოს უმაღლესმა საბჭომ.