დავით რაზმაძე ირწმუნება, რომ დამახინჯებულია მისი ციტატები სტატიაში, რომლის სათაურია „როგორ აღმოჩნდა საქართველო დემოკრატიის ავანგარდიდან ავტოკრატიის მოწინავე ხაზზე“.
რადიო თავისუფლება ტელეფონით ესაუბრა რაზმაძეს, რათა გაერკვია, რა უთხრა ამერიკელ ჟურნალისტს და რატომ უწოდებს სტატიაში მოყვანილ სიტყვებს ცილისწამებას.
რადიო თავისუფლება: თქვენი ინტერვიუს ფრაგმენტს მედიაში დიდი გამოხმაურება მოჰყვა. დღეს დილით დაწერეთ, რომ The New York Times-ის მასალაში მოყვანილი თქვენი ციტატა ცილისწამებაა.
დავით რაზმაძე The New York Times-ში გამოქვეყნებულ ინტერვიუს ფეისბუკში გამოეხმაურა.
წაგიკითხავთ თქვენს ციტატას, რომელიც The New York Times-მა დაბეჭდა: „ისინი აქ, როგორც მშვიდობისმყოფელები შემოვიდნენ, და მადლობა ღმერთს რომ შემოვიდნენ, ვინაიდან მიშას [სააკაშვილი] ხულიგნები მთელ ქალაქს ძარცვავდნენ. მათ მღვდლის მანქანაც კი მოიპარეს, თუ დაიჯერებთ. რუსები რომ არ შემოსულიყვნენ, ვინ იცის, ისინი კიდევ რამხელა ზიანს გამოიწვევდნენ“...
დავით რაზმაძე: „მშვიდობისმყოფელად“ მე როგორ შეიძლება ვახსენო რუსები? 2001 წლიდან მე რუსეთში ფეხი არ ჩამიდგამს, იმდენად მიუღებელია რუსი ჩემთვის. მათი „მშვიდობისმყოფლობა“ წარმოუდგენელია ჩემთვის. ინტერპრეტირებულია, როგორც უნდოდა.
აბსოლუტურად ცილისწამებაა. როგორ აღმოჩნდა ის კაცი, არ ვიცი. ალბათ, „მოგზავნილი“ [იყო ეს ჟურნალისტი] იმიტომ, რომ ვერცერთ ინტერვიუში ნახავთ, რომ რუსეთზე დადებითი მეთქვა. საბჭოთა დროიდან მიუღებელი იყო რუსი და მისი ჩექმა. ის ოკუპანტია და უსაშინელესი ლიდერი ჰყავს. ეს არის სამყაროს საშინელება.
გორის საკრებულოს თავმჯდომარე The New York Times-ის სტატიამდეც არაერთხელ მოექცა ქართული მედიის ყურადღების ქვეშ, თუმცა ძირითადად ანტიევროპული და სექსისტური განცხადებების გამო. წლების წინ კოლეგა ქალს გორის საკრებულოში მან „ქუჩის ქალი“ უწოდა. „ქართული ოცნების“ ქმედებების საპასუხოდ ევროკავშირის მხრიდან უვიზო მიმოსვლის გაუქმებაზე საუბრის დაწყება კი, მან რუსეთისა და პუტინის ხელისუფლების ქმედებებს გაუთანაბრა.
რადიო თავისუფლება: როგორ დაიგეგმა ეს ინტერვიუ [ჟურნალისტთან, რომელსაც „მოგზავნილი“ უწოდეთ]?
დავით რაზმაძე: ჩვეულებრივმა ადამიანმა დამირეკა, რომ The New York Times-ს უნდა თქვენთან ინტერვიუო. არავის არ ვეუბნები მე უარს ინტერვიუზე.
ჰყავდა თარჯიმანი. ფოტოები გადაიღეს. თუ არ ვცდები, აუდიოჩანაწერს არ აკეთებდა, ფურცელზე ინიშნავდა. ხელი ჩამომართვა და წავიდა.
რაზმაძე ამბობს, რომ ინტერვიუ,„თუ არ ვცდები, თებერვალში ან მარტში“ მისცა; შუადღისას დაურეკეს შესათანხმებლად და ორ საათში შეხვდა ჟურნალისტს, უთხრეს, რომ ინტერვიუ 2008 წლის ომზე იქნებოდა.
რადიო თავისუფლება: 2008 წლის აგვისტოში რა თანამდებობაზე მუშაობდით?
დავით რაზმაძე: საკრებულოს დეპუტატი ვიყავი ოპოზიციიდან, „რესპუბლიკურ პარტიას“ წარმოვადგენდი.
რადიო თავისუფლება: თქვენი აზრით, თქვენ რატომ შეგარჩიეს [ინტერვიუსთვის]?
დავით რაზმაძე: [ალბათ იმიტომ, რომ] ყველა უარს ეუბნება.
რადიო თავისუფლება: დავუბრუნდეთ ინტერვიუს შინაარს. თქვენ რა ფორმით ახსენეთ 2008 წელს რუსების ჯარის შემოსვლა?
დავით რაზმაძე: რაზეც ამახვილებს ჟურნალისტი ყურადღებას, [მიხეილ] სააკაშვილი მე იმ კონტექსტში არ მიხსენებია. მე ვთქვი, რომ სააკაშვილმა ქალაქი დატოვა უპატრონოდ. მეუფე ანდრია იყო დარჩენილი და აქა-იქ ადამიანები.
ოსური ბანდფორმირებები იყვნენ შემოსული, რომლებმაც სამი მაღაზია გატეხეს და მეუფეს მანქანა გაიტაცეს.
რადიო თავისუფლება: დავაზუსტებ, როცა მეუფის ავტომობილის მოპარვაზე საუბრობდით ამ ინტერვიუში, ახსენებდით რუსეთს და არა სააკაშვილის „ხულიგნებს“?
დავით რაზმაძე: არა, არა, რას ამბობთ?! მე სააკაშვილზე იმას გავუსვი ხაზი, რომ მიატოვეს ქალაქი და ოსური ბანდფორმირებები დათარეშობდნენ მთელ ქალაქში. მათ შორის, გაიტაცეს მეუფეს მანქანა და გატეხეს მაღაზიები.
ეს ყველაფერი ინსპირირებული იყო წლების წინ. ოკუპაციაში მთავარი როლი ითამაშა სააკაშვილმა.
რადიო თავისუფლება: თქვენი ნათქვამი ხომ არ ტოვებდა ინტერპრეტაციების შესაძლებლობას, რამდენად მკაფიოდ თქვით თქვენი სათქმელი, ის, რასაც ახლა მე მიყვებით? - „ქართული ოცნება“, რომელსაც თქვენ წარმოადგენთ, ომში მუდმივად ადანაშაულებს მიხეილ სააკაშვილსა და „ნაციონალურ მოძრაობას“.
დავით რაზმაძე: ყველაფერი იყო რუსების მიერ დადგმული, სადაც ერთ-ერთი შემსრულებელი იყო მიხეილ სააკაშვილი. სააკაშვილს ჰყავდა გუნდი, მაგრამ [მათგან] მე ვერავის დავადანაშაულებ. ის იყო „კაგებეს“ აგენტი.
რადიო თავისუფლება: ომი ვინ დაიწყო, თქვენ რას ფიქრობთ?
დავით რაზმაძე: ომი რუსეთმა დაიწყო და ხელი შეუწყო სააკაშვილმა.
რადიო თავისუფლება: „ქართული ოცნება“ რომ სააკაშვილს ადანაშაულებს?
დავით რაზმაძე: ის ბრძოლები, რაც დაიწყო 2008 წელს, ინსპირირებული იყო მაგის გამო. ის, რაც მოხდა ე.წ. სამშვიდობოებთან, არ უნდა მომხდარიყო და საერთაშორისო საზოგადოება ჩაერთო, რათა ყველაფერი განმუხტულიყო. საომარი მდგომარეობა არ უნდა გამოცხადებულიყო.
The New York Times-თან ინტერვიუში გორის საკრებულოს თავმჯდომარე ამბობს, რომ მის პარტიას რუსეთთან საერთოდ არაფერი აკავშირებს; ეს უბრალოდ მტრების მოგონილი ტყუილია. ამავე დროს, ჟურნალისტი სკოტ ანდერსონი წერს, რომ რაზმაძის მიხედვით, სამხრეთ ოსეთის ომისთვის ბრალი არც პუტინს და არც კრემლს არ ეკისრება, და ციტატად მოჰყავს: „ყველაფერში მიშაა დამნაშავე ან შეგნებულად გამოიწვია ეს სიტუაცია. ეს იყო მის მიერ შექმნილი უამრავი პრობლემიდან მხოლოდ ერთი.“
ანდერსონის მიხედვით, საათ-ნახევრიან ინტერვიუში, რომელიც გორის მერიის კაბინეტში გაიმართა, რაზმაძემ სააკაშვილს დააბრალა ყველაფერი - ეკლესიაში მლოცველთა შემცირებიდან დაწყებული, შადრევნებზე ბიუჯეტის გადაჭარბებული ხარჯვით დამთავრებული. და კვლავ ციტატა: „ეს იყო ყველაზე ბნელი დრო... ეს ყველაფერი იმიტომ, რომ მიშა იმუქრებოდა, მაგრამ ამ გატყორცნილი მუქარების შესრულება თვითონ არ შეეძლო.“
სტატიის სხვა მონაკვეთში რაზმაძე კითხულობს: „რატომ ერევიან ამერიკა და ევროპა ჩვენს პირად საქმეებში? რა უფლება აქვთ, გვიკარნახონ... პირადად მე არ მინდა ევროკავშირის ნაწილი გავხდე, რათა მათ გვიკარნახონ წესი და კანონი... ისევე, როგორც საბჭოთა კავშირი დაიშალა, ახლა მინდა ევროკავშირშიც იგივე ვიხილო, რადგან ისინი ჩვენ წინააღმდეგ არიან.“
სკოტ ანდერსონი ყურადღებას ამახვილებს, რომ ინტერვიუს განმავლობაში რაზმაძის დიდ კაბინეტში, კედელთან იჯდა ოთხი თუ ხუთი ძლიერი აღნაგობის, შავებში ჩაცმული მამაკაცი, რომელთაც ქართულ სტუმართმოყვარეობასთან არაფერი ჰქონდათ საერთო - არც წარადგინეს თავი, არც ხელი ჩამოართვეს სტუმარს. შეხვედრის ბოლოს ერთ-ერთმა მათგანმა რაზმაძეს ყურში რაღაც ჩასჩურჩულაო. ან რაზმაძემ არასწორად გაიგონა, ან გადაწყვიტა ახალი სიბრძნე დაემატებინა თავისი პარტიის თავდაყირა დაყენებული გზავნილებისთვის და თქვა: „მიზეზი, რატომ ვიყავით ყოველთვის ფრთხილები ევროკავშირში გაწევრიანების საკითხში ისაა, რომ კარგად ვიცოდით, ის "კაგებეს" აგენტებითაა სავსე.“
რადიო თავისუფლება სტატიის ავტორთან ცდილობს დაკავშირებას იმის გასარკვევად, აქვს თუ არა რაზმაძის ინტერვიუს აუდიოჩანაწერი და რას ფიქრობს გორის საკრებულოს თავმჯდომარის ბრალდებაზე. მისი პასუხი, მიღების შემთხვევაში, ტექსტში აისახება.