კრემლის მიერ გავრცელებული ინფორმაციით, „ნარენდრა მოდიმ მიულოცა ვლადიმირ პუტინსა და რუსეთის ხალხს დიდ სამამულო ომში გამარჯვების 80 წლისთავი. აღინიშნა, რომ „გამარჯვების დღე“ საერთო ზეიმია. ინდოეთის წარმომადგენელი მიიღებს მონაწილეობას საზეიმო ღონისძიებებში მოსკოვში“.
კრემლის თანახმად, ინდოეთის ლიდერმა „დაადასტურა რუსეთის პრეზიდენტის ინდოეთში მიწვევა ტრადიციული ყოველწლიური უმაღლეს დონეზე შეხვედრის გასამართავად. მიწვევა მადლიერებით იქნა მიღებული“, - აღნიშნულია კრემლის საიტზე.
გასულ კვირაში ცნობილი გახდა, რომ ინდოეთის პრემიერმინისტრი ნარენდრა მოდი, ოფიციალური მიწვევის მიუხედავად, პაკისტანთან ურთიერთობის ესკალაციის ფონზე (22 აპრილს ქაშმირში მომხდარი ტერორისტული თავდასხმის გამო), არ დაესწრება მოსკოვში 9 მაისს დაგეგმილ ღონისძიებებს და მას სავარაუდოდ ინდოეთის თავდაცვის მინისტრი რაჯნათ სინგჰი ჩაანაცვლებდა. თუმცა რამდენიმე დღეში გავრცელდა ცნობა, რომ არც სინგჰი აპირებს რუსეთის დედაქალაქში ჩასვლას.