„ზაჰესის იზოლატორში მოვინახულეთ ლაშა ჯიოშვილი. ხალხმა, ხმაურმა, მედიამ, სწრაფმა რეაგირებამ გადაგვარჩინა რომ ის არ არის წამებისა და არაადამიანური მოპყრობის მსხვერპლი“, - წერს ფეისბუკზე თორნიკე მიგინეიშვილი.
ადვოკატის ინფორმაციით, გამოვლინდა არაერთი პროცედურული დარღვევა შსს-ის მხრიდან:
- „უფლებები არ გააცნეს;
- სამმართველოში მიყვანამდე არ იცოდა, რატომ იყო დაკავებული და ვის მიერ;
- არ დაარეკინეს ადვოკატთან ან/და ოჯახთან;
- მოსთხოვეს ტელეფონის გახსნა“.
თორნიკე მიგინეიშვილის განცხადებით, სახალხო დამცველის წარმომადგენელმა დააფიქსირა ოქმში, რომ სამართალდამცავების მიერ ლაშას მისამართით იყო მუქარა.
„დაკავებისას არაპროპორციული ძალის გამოყენების გამო მარცხენა ხელზე აქვს სისხლჩაქცევა“, - წერს ადვოკატი.
18 თებერვალს, - ბიძინა ივანიშვილის დაბადების დღეს, - ათასობით დემონსტრანტი შეიკრიბა რუსთაველის გამზირზე. დაკავებამდე დაახლოებით ერთი საათით ადრე, ლაშა ჯიოშვილმა რადიო თავისუფლებას უთხრა:
„ის, რაც დღეს ხდება, არის საშინელება, შეუძლიათ, ამ ბანერის გამო აქ დამაკავონ არჩადენილ დანაშაულზე“.
მას აქციაზე მიტანილი ჰქონდა ბანერი წარწერით: „დღეს ყველა ვთანხმდებით პრეზერვატივის მნიშვნელობაზე“.
ადვოკატის ცნობით, ჯიოშვილი დაკავების შემდეგ მუხიანის სამმართველოში გადაიყვანეს: „პირველივე წუთებიდან გადაყვანილი იყო მუხიანის სამმართველოში და ჩვენ მიერ არაერთი ზარის მიუხედავად, გვატყუებდნენ, რომ დაკავებული იქ არ იმყოფებოდა. პარალელურად, ლაშას ესმოდა ჩვენი ზარები“.
ადვოკატი ასევე ავრცელებს ჯიოშვილის გამოგზავნილ წერილს:
„მეგობრებო, პირველ რიგში, მადლობა. შედეგი მიღწერულია. „ბატონი“ თავის დაბადების დღეზე შევაწუხეთ. ცეცხლი ოლიგარქიას! თქვენი შეშინებულსი დედაც! მალე შევხვდებით“.
თვითმხილველი ქეთი წულუკიძე, რომელიც ჯიოშვილის დაკავებისას ფეისბუკზე პირდაპირ ეთერში ჩაერთო და პოლიციელებს ეუბნებოდა, რომ უღებდა და დემონსტრანტის გაშვებისკენ მოუწოდებდა, რადიო თავისუფლებასთან საუბარში ჰყვება, რომ პროევროპული საპროტესტო აქციიდან წამოსვლის შემდეგ დაინახეს, როგორ მირბოდა დროშიანი ბიჭი და როგორ მისდევდა მას მინიმუმ 10 ადამიანი.
„დროშით მივხვდით, რომ ვიღაც ჩვენიანს მისდევდნენ, გავაჩერეთ მანქანა და დავიწყეთ გადაღება. თავიდან პასუხს არ გვცემდნენ, არცერთს არ ეცვა პოლიციის ფორმა, რომ დაგვინახეს ვიღებდით, გაიკეთეს ნიღბები. ერთ-ერთი სახე, რომელიც ამბობს, რომ პოლიცია ვართო, დავაფიქსირეთ. ჩატენეს მანქანაში და წაიყვანეს ეს ბიჭი“, - ამბობს ის.
„წამიერად გავიფიქრე, რომ 112-ში დავრეკავდი დასახმარებლად... მაგრამ მივხვდი, რომ აზრი არ ჰქონდა - ისეთ გარემოში ვცხოვრობთ, რომ ვერავინ ვერ გვიცავს ერთმანეთის გარდა და ეგრევე „ლაივი“ ჩავრთეთ“, - ქეთი წულუკიძე.
შინაგან საქმეთა სამინისტროში რადიო თავისუფლებას განუცხადეს, რომ ლაშა ჯიოშვილი ადმინისტრაციულ სამართალდარღვევათა კოდექსის 173-ე მუხლით არის დაკავებული, რაც პოლიციისადმი დაუმორჩილებლობას გულისხმობს.