დონალდ ტრამპმა ხელი მოაწერა კანონპროექტს რუსეთის მიმართ ახალი სანქციების შესახებ

აშშ-ის პრეზიდენტმა დონალდ ტრამპმა ხელი მოაწერა კანონპროექტს რუსეთის წინააღმდეგ ახალი სანქციების შესახებ. გასული თვის ბოლოს აშშ-ის კონგრესის ორივე პალატაში თითქმის ერთხმად დაამტკიცეს კანონპროექტი, რომელიც პრეზიდენტის ხელმოწერის შედეგად ახლა კანონად იქცა. ახალი სანქციების მიზეზებს შორის არის რუსეთის სავარაუდო ჩარევა აშშ-ის წინასაარჩევნო კამპანიაში, აგრეთვე რუსეთის აგრესია უკრაინის მიმართ და სირიის მმართველი რეჟიმის სამხედრო მხარდაჭერა. კანონში ნახსენებია საქართველოც: სერიოზულ საფრთხედ არის შეფასებული უკრაინის გარდა, საქართველოსა და მოლდავეთის მიმართ რუსეთის მხრიდან გამოვლენილი აგრესია. აშშ-ის ახალი კანონი ითვალისწინებს ზომებს რუსეთის ენერგოკომპანიების წინააღმდეგ და აუქმებს პრეზიდენტის უფლებას, კონგრესისაგან ნებართვის გარეშე შეამსუბუქოს რუსეთის წინააღმდეგ მიმართული სანქციები.