„აღშფოთებული ვარ! საქართველოში რეჟიმმა ლიბერალური ოპოზიციის კიდევ სამი ლიდერი დააპატიმრა. ეს პოლიტიკური დევნაა“, - წერს პოლიტიკოსი ფეისბუკზე.
„საქართველოში დემოკრატიული ღირებულებებისა და თავისუფლებების ეროზია ჩვენ თვალწინ ხდება. „ქართული ოცნების“ რეჟიმს უნდა ეშინოდეს მიმდინარე დემონსტრაციების, მზარდი საზოგადოებრივი ზეწოლისა და ხმამაღალი ოპოზიციის“, - აცხადებს ის.
სვენია ჰანის განცხადებით, ALDE, - ალიანსი ევროპაში 70-ზე მეტ წევრ პარტიას აერთიანებს, მათ შორის „სტრატეგია აღმაშენებელს“, „გირჩი-მეტი თავისუფლებას“ და „ლელოს“, - კვლავ აგრძელებს მეგობრებისა და დემოკრატიის მხარდამჭერი საქართველოს ხალხის მხარდაჭერას.
„ქართული ოცნების“ რეჟიმმა უნდა პატივი სცეს საერთაშორისო სამართლის წინაშე აღებულ ვალდებულებებს, დაუყოვნებლივ გაათავისუფლოს ლიბერალური პარტიების დაპატიმრებული ლიდერები, მოუხსნას ბრალდებები ოპოზიციას და საქართველო დააბრუნოს ევროპულ გზაზე, რომელიც ქართველმა ხალხმა აირჩია და რასაც საქართველოს კონსტიტუციას მოითხოვს“, - წერს ALDE-ს პრეზიდენტი.
ფეისბუკ-პოსტში მას მონიშნული ჰყავს გიორგი ვაშაძე, მამუკა ხაზარაძე, ბადრი ჯაფარიძე და ზურაბ გირჩი ჯაფარიძე. ყველა მათგანი „ქართული ოცნების“ მიერ სადავო პარლამენტში შექმნილ დროებით საგამოძიებო კომისიაზე გამოუცხადებლობისთვის არის ციხეში.
- გიორგი ვაშაძეს შვიდი თვით პატიმრობა მიუსაჯეს; ის დღეს 24 ივნისს დააპატიმრეს.
- მამუკა ხაზარაძესა და ბადრი ჯაფარიძეს - რვა-რვა თვით პატიმრობა; ისინი გუშინ, 23 ივნისს დააპატიმრეს.
- ზურაბ გირჩი ჯაფარიძეს - შვიდი თვით პატიმრობა. ის 22 მაისს დააკავეს მას შემდეგ, რაც გირაოს თანხა არ გადაიხადა.
- ყველა მათგანს ორი წლით აუკრძალეს თანამდებობის დაკავება.
ამავე მუხლით დაკავებულნი არიან ნიკა მელია, ნიკა გვარამია და ირაკლი ოქრუაშვილი. მათი განაჩენი სასამართლოს ჯერ არ გამოუცხადებია.
ექსპრემიერი გიორგი გახარია იმ გამონაკლის ოპოზიციონერებს შორისაა, რომლებიც კომისიის სხდომაზე მივიდნენ.
16 ივნისს ცნობილი გახდა, ის კიდევ ერთხელ დაიბარეს კომისიაზე. ის 23 ივნისს უნდა გამოცხადებულიყო, თუმცა ქვეყანაში არ იმყოფება. მისი პარტიის ცნობით, ის თანახმა იყო დისტანციურად ჩართვაზე, თუმცა კომისიამ ეს თხოვნა არ დააკმაყოფილა.
მეორედ არიან დაბარებულები ნიკა გვარამია და მამუკა ხაზარაძე - დისტანციურად, საპატიმროდან ჩართვით. სავარაუდოდ, ისინი არც ამჯერად გამოცხადდებიან.
დროებითი საგამოძიებო კომისიის თავმჯდომარე თეა წულუკიანის თანახმად, შესაძლოა, ხაზარაძისა და გვარამიას წინააღმდეგ კვლავ მიმართონ პროკურატურას.
24 ივნისს ირაკლი ოქრუაშვილის ადვოკატმა განაცხადა, რომ ოქრუაშვილს დღეს საპატიმროში ახალი ბრალი წარუდგინეს - გორში მომხდარ „საყოფაცხოვრებო შემთხვევასთან“ დაკავშირებით.
ფორუმი