აღკვეთის ღონისძიების შეცვლის შუამდგომლობას ასაბუთებს ირაკლი ქერაშვილის ადვოკატი, რევაზ აჭარაძე. ის ამბობს, რომ მიმალვის საფუძველზე ისედაც ვერ დაინახეს იმ მოსამართლეებმა, რომლებიც აღკვეთის ღონისძიებაზე მსჯელობდნენ აღკვეთის ღონისძიების შეფარდებისა და წინასასამართლო სხდომებზე.
„არანაირი მტკიცებულება არ გამოკვეთილა, რომელიც მიუთითებს ირაკლი ქერაშვილის მიერ დანაშაულის ჩადენას. მთავარი გამომძიებლისგან ვრცელი პასუხები მივიღეთ, რომელიც მიუთითებდა, რომ ე.წ. ორგანიზატორებთან კავშირი ვერ დაადგინეს. უფრო მეტიც, თურმე ე.წ. ორგანიზატორები რუსთაველის გამზირზე არც გეგმავდნენ ძალადობას.... არანაირი მტკიცებულება იმისა, რომ ბრალად წარდგენილი ქმედება ჩაიდინა ირაკლი ქერაშვილმა, არ არსებობს. როცა ახალი დანაშაულის ჩადენაზეა მსჯელობა ის ჰიპოთეტური არ უნდა იყოს.ის არ არის ნასამართლევი, წარსულში დანაშაული არ ჩაუდენია. ირაკლი რომ ყოფილიყო სანამართლები დანაშაულებზე და იგივე მუხლით ჰქონოდა ბრალი წარდგენილი, შეიძლება სასამართლოს ემსჯელა, რომ ის ვერა და ვერ გამოსწორდა... თქვენ ვერ იპოვით არგუმენტს, რომ ის განმეორებით დანაშაულს ჩაიდენს... ჰიპოთეტურ მსჯელობაზე არ უნდა იყოს დაყრდნობილი სასამართლო, როცა ყველაზე მძიმე აღკვეთის შეფარდებასა თუ ძალაში დატოვებაზე მსჯელობს", - ამბობს რევაზ აჭარაძე.
მისივე განცხადებით, ბრალდებამ ვერ დაასაბუთა აღკვეთის ღონისძიების სხვა ფორმა, რატომ არ ექნებოდა იგივე შემაკავებელი მექანიზმი. ის აჯამებს თავის გამოსვლას და ასახელებს სამ საფუძველს აღკვეთის ღონისძიების შეფარდების: მიმალვა, მოწმეებზე ზემოქმედება, ახალი დანაშაულის ჩადება და ასკვნის, რომ არც ერთი გარემოა სახეზე არაა.
ადვოკატი, გოგიტა ბახტაძე საუბრობს სავარაუდო შეწყალების დაპირებაზე, რასაც ბრალდებულების ხმრიდან წინა სხდომაზე მკვეთრი უარი მოჰყვა და ამ შემთხვევას აღკვეთის ღონისძიების შეცვლასთან აკავშირებს:
„ამ ადამიანებს სასჯელის აღსრულების მიმართ პრობლემა არ აქვთ, მათთვის მთავარია აღსრულდეს სამართალი... როცა გიორგი ტერიშვილი გაძევებული იყო და განიხილავდით შუამდგომლობას, ანდრომ და ონისემ გააკეთეს განცხადება, რომ თუ არ დააბრუნებდნენ, ისეთ ქმედებას ჩაიდენდნენ, რომ მათაც გააძევებდით, პირველი რაც გამოიწვია ამან იყო გულისაჩუქება, მათი ქმედებები არის გულისამაჩუყებელი.... მიუხედავად იმისა, რომ უსამართლოდ სხედან ამდენი დღე ციხეში უარყოფითი დამოკიდებულება არ გამოუვლენიათ".
ვალერი თეთრაშვილის ადვოკატი ირმა ჭკადუა მოითხოვს პატიმრობის თავისუფლებით შეცვლას. ის ყურადღებას ამახვილებს ფაქტზე, რომ თეთრაშვილი ნასამართლები არ არის და ადმინისტრაციული ჯარიმაც კი არ ჰქონია.
„ისინი შემოგყურებენ იმედით, რომ არ იქნებით დაინტერესებული... თქვენ ხართ ინსტიტუტი, რომელსაც ხელგეწიფებათ, თუნდაც შინაგანად დარწმუნებული იყოთ, რომ მათ დანაშაული ჩაიდინეს, თქვენ გაქვთ შესაძლებლობა დროებით მისცეთ მათ თავისუფლება. ეს იქნება ერთგვარი ტესტი, რომ დარწმუნდეს ბრალდების მხარე და ერთი მხრივ სასამართლო, რამდენად მიდრეკილი არიან დანაშაულის ჩადენისკენ", - ამბობს ირმა ჭკადუა.
მას რჩება შთაბეჭდილება, რომ დღეს წინასწარი პატიმრობა გამოყენებულია სადამსჯელო ღონისძიებად.„თქვენ შეგიძლიათ შეწყვიტოთ, რომ ეს დასჯა არ იყოს", - მიმართავს მოსამართლეს.
ირმა ჭკადუას თქმით, მართალია ბრალდება მათ არ ედავება, რომ პოლიცილებს ზიანი მიაყენეს, მაგრამ დღეს არის რეალობა, როცა ვალერი თეთრაშვილს ხელს ვერავინ ადებს, არ არსებობს ადამიანი, ვინც თეთრაშვილმა დააზიანა, ამასთან არ დასტურდება ორგანიზატორებთან და ერთმანეთთან კავშირი.
„თუ არა თქვენი დაინტერესება, დღეს ეს ადამიანები იყვნენ საპატიმროში თქვენ გაქვთ შესაძლებლობა გამოიყენოთ ნაკლებად მძიმე აღკვეთის ღონისძიება, თუმც მე მიმაჩნია, რომ აღკვეთის ღონისძიების გამოყენების საფუძველი არ არსებობს', - ამბობს ჭკადუა.
ონისე ცხადაძე: მე რასაც მივხვდი, რასაც მოვუსმინე ადვოკატებს მემგონი ყველანაირი მიზეზი და გარემოება გაქვთ იმის, რომ ჩვენს უფლებადამცვეებს დაეთანხმოთ, მე რომ ვიყო ნეიტრალური პიროვნება, ამ დარბაზში რომ ვიჯდე, ეს არის მარტივი ჭეშმარიტება, ამის დანახვას არაფერი უნდა... ყველა უნდა დაეთანხმოს, ჩემზე უკეთესად იცით ეს ყველაფერი თქვენ და მინდა, რომ დღეს გადადგათ სწორი ნაბიჯი.
მე მინდა დღეს გაგვიშვან... ჩემს ფსიქიკაში არის ესეთი რამ, ის, რაც მე დამემართა რეალურად ვერ აღვიქვამ, ვერ განვიცდი იმას, რასაც უნდა განვიცდიდე, რადგან ვერ ვდგავარ იმ ადამიანებთან, ვინც ამას განიცდის. მინდა ჩემს ოჯახთან ერთად ყოფნის საშუალება მომცეთ...ზოგს შვილი ჰყავს დატოვებული.. ზოგს... ფსიქიკაში ცარიელი ადგილები რჩება, ადამიანის გონებაში...ჩვენ ვართ ისეთი ადამიანები, რომლებიც ამ ცარიელ ადგილებს აქედან გასვლის შემდეგ ერთ წამში ამოვავსებთ. ციხის არ გვეშინია, კი არ ვბლატაობთ და თავს ვინმეს კი არ ვაჩვენებთ, პირიქით უფრო მეტად შევუწყობთ გამოძიებას ხელს და დავეხმარებით, მე არ მინდა რომ ნასამართლეობა მქონდეს, რადგან ეს ხელს შემიშლის ჩემს მიზნებში, რაც მაქვს დაგეგმილი. ანდროს არ უნდა უნდოდეს, 21 წლის ბიჭს არ უნდა უნდოდეს მიიმალოს, არსად მივიმალებით პირიქით დაგეხმარებით.
მინდა დაფიქრდეთ, ოდესმე ჩვენნაირი კრიმინალები თუ გყოლიათ საბრალდებო სკამზე, ადამიანებს ღიმილი არ გვაკლდება სახეზე, ამ სიტუაციაშიც მხნედ ვართ, კი რთულია მაგრამ... მთელი სულით და გულით ვგრძნობ, რომ ყველაფერი შეიცვლება და ის ადამიანები, რომლებიც ამას გავალებენ, აღარ იქნებიან.. ვინც ამ ყველაფერს გაკეთებინებთ და ვინც ამაში შეგითრიათ იმათ საერთოდ არ აინტერესებთ, მინდა ეს ამბავი ერთ იუმორისტულ ნომერში მოვყვე და დავივიწყო, არც ღვარძლი მექნება არც ბოღმა და არც შურისძიების განზრახვა. ამ ინსტიტუტის გამო გააკეთეთ, პროკურატურის გამო გააკეთეთ, პატივი ეცით თქვენს პროფესიას, რომელსაც ემსახურებით, რაღაც აფსურდში გვატარეს რვა თვე და მთავარმა გამომძიებელმა დაგვიდასტურა ეგ აბსურდიაო. დღეს ეს გაფუჭებული კარი გაგვიღეთ და პირადად მოვალ და შევაკეთებ.
ანრო ჭიჭინაძე: აღმოჩნდა, რომ ახალი გარემოება არის და შესაბამისად, უნდა გადაისინჯოს აღკვეთი. მე ვერაფერს მოგიწოდებთ და ვერც რჩევას მოგცემთ, ჩემგან არასწორი მგონია გითხრათ, რა გადაწყვეტილება მიიღოთ, მე მგონი რომ სიმართლემ უნდა ილაპარაკოს, იყვიროს, იზეიმოს.
ის პერიოდი, რვა თვეა, სულ არის მოლოდინი, რომ რაღაც უნდა წარმოადგინონ ამ ადამიანებმა ვინც ჩემს წინ სხედან, არაფერი გამოჩნდა, წინა სასამართლოზე მთავარი მოწმე გამოცხადდა და თქვა, რომ არანაირი პირდაპირი მტკიცებულება არ არსებობს იმაში რაშის პროკურატურა გვედავება, შესაბამისად, მგონია ჩემი აზრია ასეთი, რომ თუ თქვენ მიიღებთ გადაწყვეტილებას რომ ჩვენ აქედან წავიდეთ ციხეში, დამტკიცდება ის ჩემი ვარაუდი, მთავრობის წევრები ახდენენ ზეგავლენას სასამართლოზე, რაზეც მანამდე ვილაპარაკე, იმიტომ რომ ამ შემთხვევაში არანაირი საფუძველი არ არსებობს იმისთვის, რომ აქედან ციხეში წავიდეთ. ვერაფერს მოგიწოდებთ და გეტყვით, აქ უნდა ილაპარაკოს სიმართლემ".
ფორუმი