"ქართული ოცნების" ერთ-ერთი ლიდერი მამუკა მდინარაძე ჟურნალისტებს ჰპირდება, რომ დადგება დრო, როცა მათ მოუყვება, როგორ მიიღო არასწორი ინფორმაცია საქართველოს მესამე პრეზიდენტის, მიხეილ სააკაშვილის კურორტ ტრუსკავეცში ყოფნის შესახებ მაშინ, როცა ის რეალურად საქართველოში იყო. ამის შესახებ მან დღევანდელ პრესკონფერენციაზე ჟურნალისტებს უთხრა.
"რაც მე პოლიტიკაში ვარ და ზოგადად, ცხოვრებაში, ერთადერთი არასწორი ინფორმაციის გახმოვანება მომიწია - ტრუსკავეცთან დაკავშირებით. სხვა ჩემი არასწორი ინფორმაცია არ გახსენდებათ, "მთავარი არხი" რომ მიდასტურებს, უღრმესი მადლობა და ამასთან დაკავშირებითაც მოვა დრო და ვილაპარაკებ, საიდან მქონდა ინფორმაცია. ჩემით რომ არ მომაფიქრდებოდა და არ დამესიზმრებოდა, ამას ყველა დამემოწმებით", - თქვა მდინარაძემ.
მანვე ოპოზიციური ტელევიზიების რამდენიმე ჟურნალისტს, რომლებიც მის პრესკონფერენციას ესწრებოდნენ, 1 აპრილი მიულოცა და უთხრა, რომ ეს მათი პროფესიული დღეა. წლებია, საზოგადოებაში წესად იქცა 1 აპრილს რეალობასთან მიახლოებული ტყუილებით ხუმრობა.
საქართველოს მესამე პრეზიდენტი მიხეილ სააკაშვილი, რომელსაც ორ საქმეზე 6-წლიანი პატიმრობა ჰქონდა შეფარდებული, საქართველოში 2021 წლის სექტემბრის ბოლოს დაბრუნდა. მან 1 ოქტომბერს საკუთარ ფეისბუკზე დაიწყო საქართველოში გადაღებული ვიდეოების დაპოსტვა. უმრავლესობის ლიდერები, მათ შორის შინაგან საქმეთა მინისტრის მოადგილე, ამტკიცებდნენ, რომ მიხეილ სააკაშვილს საქართველოს საზღვარი არ ჰქონდა გადმოკვეთილი.
